Para sa atong mga pinalanggang vendors:
Nakita nako ang inyong kakugi ug paningkamot alang sa inyong pamilya. Kamo ang dughan sa merkado, ang tinubdan sa pagkaon sa matag panimalay, ug kusog sa ekonomiya sa Iligan. Ang inyong kahago mao ang nagapalihok sa atong mga palengke, nagahatag og kabusog sa mga panimalay, ug nagapadayon sa panginabuhian sa daghang pamilya sa atong syudad.
Busa, kauban ang tibook United Iligan Party, padayon ako maningkamot nga mapalambo ang inyong panginabuhian. Usa sa atong mga lakang mao ang tarungon ang Palao Market, aron mas daghan ug oportunidad, limpyo ug organisadong merkado, ug mas daghang mamalitay. Apil niini ang pagpatuman sa mas episyenteng sistema sa basura, pagpaayo sa imprastraktura sa merkado, ug paghatag og mga programa nga makapadugang sa inyong kita.
Ang gobyerno dapat mutabang, dili mobiya. Ang akong suporta kanunay anaa kaninyo. Dili mo angay magpabilin sa kasamtangang kahimtang nga puno sa mga hagit. Ato kining sulbaron pinaagi sa ligdong ug matinud-anong panggobyerno nga adunay tinuod nga kasing-kasing para sa katawhan.
Mga Hagit sa mga Vendors sa Iligan
Nasayod kami sa inyong mga panginahanglan ug mga hagit nga inyong ginatubang matag adlaw. Lakip niini ang:
Kawad-on sa Organisadong Estraktura – Daghang merkado ang wala pa mahatagan ug maayong imprastraktura. Ang uban walay igong atop, limpyo nga kasilyas, ug maayong kanal para sa tubig ug basura.
Problema sa Basura ug Kalimpyo – Tungod sa daghang tawo nga nagagamit sa merkado, daghan usab ang basura. Kailangan nato og epektibong waste management system para mapadayon ang kahapsay.
Kakulangan sa Suporta sa Gamay nga Negosyo – Ang pipila ka vendors nagkinahanglan og dugang tabang sa pondo, teknikal nga suporta, ug mga libreng training para mapadako ang ilang kita.
Kakuyaw sa Seguridad ug Kriminalidad – Ang mga petty crimes sama sa pagpangawat ug pagpanghulga sa vendors usa sa mga problema nga kinahanglan hatagan ug solusyon.
Kasamtangang Buhis ug Bayronon – Daghang vendors ang naglisod sa pagbayad sa ilang buhis ug upa tungod sa kakuwang sa kita ug nagataas nga palaliton.
Atong mga Solusyon
Sa United Iligan Party, andam kami nga mosuporta ug mangita og paagi aron matubag ang inyong mga panginahanglan. Ania ang among mga konkretong plano:
Pagpasiugda sa Modernisasyon sa Merkado
Pagpaayo sa mga kasilyas, kanal, ug linya sa tubig.
Pagbutang ug mas daghang saktong parking area para sa mga mamalitay.
Pagtukod ug mas maayong ventilation ug drainage system aron malikayan ang baha ug baho sa palibot.
Pagpahimutang ug epektibong waste segregation ug disposal system.
Paghatag og Suporta sa mga Vendors
Pagtukod ug programa nga mohatag ug kapital ug pautang sa mga vendors nga walay dako nga interes.
Pagpahigayon og libreng negosyo training ug financial literacy workshops para matabangan kamo sa pagdumala sa inyong kita.
Pag-organisar ug vendor associations aron mas dali ang komunikasyon sa gobyerno ug sa komunidad sa merkado.
Pagsiguro sa Kaluwasan sa Merkado
Pagbutang og dugang security personnel ug CCTV aron mapugngan ang kriminalidad.
Pagpatuman sa mas hugot nga regulasyon batok sa pagpanglimbong, pagpanghulga, ug pangawat.
Pagsabot sa mga vendors kung unsaon pagreport sa mga insidente aron dali ang aksyon sa kapulisan ug barangay.
Pag-usab sa Sistemang Buhis ug Upa
Pagsusi sa kasamtangang rate sa upa ug buhis ug pagpaubos niini kung posible.
Paghatag og insentibo sa mga vendors nga adunay matinud-anong pagbayad sa ilang obligasyon.
Paghimo og mas maayong sistema sa pagbana-bana sa buhis aron mas patas ug hapsay ang pamaagi.
Pagpakabana ug Pagkahiusa
Gusto nato nga ang matag vendor makasinati ug bag-ong kasulbaran sa ilang mga problema. Busa, kinahanglan nga magtinabangay kita. Kung kita mag-uban ug maghiusa, mas dali nato matuman ang mga maayong plano alang sa merkado.
Ang akong pangandoy alang sa Iligan dili lamang alang sa mga dagkong negosyante kundi alang usab sa mga vendors nga maoy backbone sa lokal nga ekonomiya. Dili mo angay mahadlok nga ipadayag ang inyong mga panginahanglan. Open ang akong pultahan ug akong paminawon ang inyong mga sugyot ug reklamo.
Ang Palao Market, merkado sa Tubod, Tambo, ug uban pang dapit sa Iligan kinahanglan mahatagan ug igong pagtagad. Dili lang kini kinahanglan nga himuong limpyo kundi kinahanglan usab nga organisado, mas luwas, ug mas produktibo alang sa tanan.
Panawagan sa Tanang Vendors
Sa atong paningkamot nga mapalambo ang merkado, nagapanghinaut ako nga kamo moapil ug mosuporta sa atong kalihokan. Aron kini mahimong tinuod nga kalampusan, kinahanglan nato ang inyong pakig-alayon ug tinud-anay nga kooperasyon.
Kining among mga plano dili lamang para sa usa ka tuig kundi para sa dugay nga panahon nga kaayuhan. Kung matuman nato kini, mapahimoslan kini sa atong mga anak ug sa mosunod pang henerasyon.
Hinumdumi, ang gobyerno dapat mutabang, dili mobiya.
Ako, kauban sa United Iligan Party, mopadayon sa among paningkamot alang kaninyo. Ang akong suporta kanunay anaa kaninyo. Magkahiusa ta alang sa mas hayag nga kaugmaon sa atong merkado ug panginabuhian!
Padayon, Iligan! Padayon, mga vendors! Ang kalampusan inyong gipaninguha, among ipatuman!